Кукмарада «Имин тәгәрмәч» конкурсының район туры үтте

Манзарас урта мәктәбендә «Имин тәгәрмәч» бәйгесе узды. Балалар катнашында килеп чыгучы бәхетсезлек очракларын кисәтү максатында оештырылган әлеге чарада район мәктәпләреннән 28 команда катнашты.

Яшь юл хәрәкәте инспекторлары велосипедта фигуралы йөрү, юл хәрәкәте кагыйдәләрен белү, беренче медицина ярдәме күрсәтү, юл картасы, тормыш иминлеге низеләре һәм иҗади бәйгеләрдә үзләренең белемнәрен сынады, осталыкларын күрсәтте. 

Барлык балларны бергә туплаганнан соң, беренче урынга Манзарас урта мәктәбе командасы чыкты. Икенче урында — Зур Сәрдек гимназиясе, өченчедә — Кукмара 3нче урта мәктәбе командасы. 

«Юл йөрү кагыйдәләрен иң яхшы белүчеләр» номинациясендә — Урта Комар, «Беренче медицина ярдәме күрсәтү нигезләре»ндә — Кукмара беренче гимназиясе, «Иң яхшы велосипедта йөрүчеләр»дә — Сәрдекбаш урта мәктәбе, «Тормыш иминлеге нигезләре»ндә — Поч. Сутер, «Иҗади бәйге»дә Ядегәр урта мәктәбе командалары җиңүче булды. 

Район юл хәрәкәте иминлеге дәүләт инспекциясе начальнигы Фирдүс Фәхретдинов сүзләренә караганда, быелның өч аенда район юлларында 5 юл-транспорт һәлакәте теркәлгән, аларда бер кешенең гомере өзелгән, 7се төрле тән җәрәхәтләре алган. Балалар катнашында булган бер фаҗигадә бер бала имгәнүләр алган. 

«Районда „Имин тәгәрмәч“ конкурсын уздыру матур традициягә әйләнде. Балалар юлда үз-үзләрен тоту кагыйдәләрен яхшы белергә, шулай ук фаҗигаләр килеп чыкканда беренче ярдәм күрсәтү белергә тиеш. Җиңүче команда, конкурсның республика этабында катнашып, район данын яклаячак», — диде Фирдүс Фәхретдинов.

Фото: Алсу Сәләхетдинова/ «Хезмәт даны»