Кукмарада өстәл теннисы буенча «Район башлыгы Кубогы»на район Беренчелегенең IV этабы узды

Бүген «Барс Арена» спорт-сәламәтләндерү комплексында өстәл теннисы буенча «Район башлыгы Кубогы»на район Беренчелегенең IV этабы узды.

«Турнир өч яшь категориясендә үткәрелә. Бүген ярышка 18 яшьтән өлкәнрәк ир-атлар килде, ә 24 августта 18 яшькә кадәрге егетләр, кызлар һәм хатын-кызлар уйнаячак. Бу турнир декабрьгә кадәр дәвам итәчәк, ахырда супер-финал узачак», — дип сөйләде ярышларның хөкемдары Рөстәм Фәйзуллин.

Беренчелекнең өч этабы нәтиҗәләре буенча 18 яшьтән өлкәнрәк ир-атлар арасында беренче өчлектә лидер булып, Кукмарадан Рөстәм Фәйзуллин, Ленар Әүхәдиев, Ленар Галиев танылды. 18 яшькә кадәрге егетләр арасында җиңүчеләр — Чишмәбаш авылыннан Нәфкать Ногманов, Кукмарадан Артем Захаров, Илназ Нәҗипов, кызлар һәм хатын-кызлар арасында Кукмарадан Әмилә Яппарова, Гүзәлия Галиуллина, Наилә Хәбибуллина.

Район башлыгы Сергей Димитриев та актив позициядә тора. Ул, алдагы еллардагы кебек үк, беренчелекнең һәр этабында теннис уйный.

Фото: Эльвира Иванова/ «Кукмор-информ»