Кукмаралы: «Камералар куеп булмыймы?»

Кукмара үзәгеннән читтәге урамнарда светофорның яшел уты янса да, җәяүлеләр аннан чыга алмый. Чөнки күп вакыт автомобиль йөртүчеләр юл бирми. Анда камералар куеп булмыймы икән? Без кич белән оныкны Заһидуллин урамыннан чыгып алабыз, бәла-каза чыкмасын дип куркабыз. 

Наилә ГАЛИМУЛЛИНА
 
Әлеге сорауга район ЮХИДИ җитәкчесе Фирдүс ФӘХРЕТДИНОВ болай дип җавап бирде:

- ЮХИДИ хезмәткәрләре юллардагы тәртипне һәрчак контрольдә тота. Светофорның яшел утында җәяүлеләрне үткәрмәүче шоферлар да, кагыйдәләрне үтәмәүче җәяүлеләр дә штрафка тартыла. Әмма шуны да билгеләп узыйм: һәр светофор янына инспектор билгеләү мөмкин эш түгел. Камера кую мәсьәләсе турында район Башкарма комитетында оешкан юл хәрәкәте иминлеге комиссиясе җитәкчесе исеменә язма гариза белән мөрәҗәгать итәргә кирәк. 

Юлларда һәркем игътибарлы һәм сак булсын, фаҗигаләргә юлыкмасын иде. 

Фото: «Татар-информ» МА