Ут капкан фермадан 160 сыерны коткарганнар

Татарстанда ут капкан фермадан 160 сыерны коткарганнар. Бу хакта «Татар-информ» агентлыгына Россия Гадәттән тыш хәлләр министрлыгының ТР буенча Баш идарәсе матбугат хезмәтеннән хәбәр иттеләр.

«18 февральдә 10.48 сәгатьтә 112 бердәм номерына республиканың Кама Тамагы районы Кече Салтык авылы фермасында янгын чыгуы турында хәбәр килгән», - дип искәрттеләр ведомствоның матбугат хезмәтендә.

116нчы янгын сүндерү-коткару часте хезмәткәрләре, шулай ук «КУГР» ҖЧҖ һәм Яңасала авыл җирлеге ирекле янгын сүндерү командалары урынга 20 минут эчендә килеп җиткән.

Урында ачыкланганча, ут белән көрәшүчеләр килгәнче ферма хезмәткәрләре төтен белән тулган бинадан 160 сыерны алып чыгарга өлгергән була инде. Алар бинада беркемнең дә булмавын әйтә. Ватык тәрәзә һәм ишекләрдән куе төтен күтәрелә.

Ут белән көрәшүчеләр янгынны 25 минут эчендә сүндергән.

Янгын электр җиһазын монтажлау кагыйдәләрен бозу аркасында чыккан дип фаразлана.

Фото: ГУ МЧС России по РТ