Тоз күлендәге һәлакәтне безнекеләр дә күргән

13 яшьлек малай гаиләсе белән Минзәләдән ял итәргә килгән. Яшенле яңгыр ява башлаганда, ул суда булган. Фаҗигане үз күзләре белән күргән кешеләр раславынча, коткаручылар репродуктор аша ял итүчеләргә тиз арада судан чыгарга кушкан. Туристларның күпчелеге якындагы кафега кереп яшеренгән. Суда дистәгә якын кеше калган.

    Алсу- Азат Фазлыевлар концерт белән барган. Алар белән бергә Олы Әтнә егете Илнар Гатиятуллин да шунда булган. 

- Без шунда, Соль-Илецкиның үзендә идек, күлгә төшкән вакыт иде. Яңгыр килә башлагач, кара болытларны күргәч без "Кедровая бочка"га кереп киттек. Без шунда утырганда яуды яңгыр, бик каты яуды, чиләкләп койды, ташулар акты. Минзәләдән килгән егетне шунда яшен суккан, ул судан чыгып өлгерә алмаган. Суда кеше күп иде шул, болыт килгәнне күргәч тә чыкмадылар күбесе. Ул егетне "Ашыгыч ярдәм"  машинасы алып китте. "Юлда үлгән", диделәр. Башкалар исән-сау, тик вакытында бик ыгы-зыгы, тавыш иде, кайтып китүчеләр дә булды. WhatsAppта йөргән хәбәр хәвефлерәк,  ул дәрәҗәдә үк булмады.   Без концертны шул көнне кич куйдык, - дип сөйләде Илнар Ирек улы.

http://atnya-rt.ru/news/khvef-khtr/toz-klendge-laktne-beznekelr-d-krgn