Татарстанда узган тәүлектә коронавирусның тагын 188 очрагы ачыкланган

Татарстанда узган тәүлектә Сovid-19 коронавирусының 188 яңа очрагы теркәлгән. Инфекцияне биш кеше читтә, калганнары авырулар белән аралашудан йоктырган, дип хәбәр итә ТР Сәламәтлек саклау министрлыгының матбугат хезмәте, дип яза «Татар-информ» МА.

«Егерме биш кеше хастаханәгә салынды, 163 кеше өйдә дәвалана», - диделәр ведомствода.

Авыручыларның күбесе Казанда теркәлгән – чирне биредә 126 кеше йоктырган. Чаллыда авыруның 17 очрагы билгеләнгән, ә Яшел Үзән һәм Түбән Кама районнарында — җидешәр. Республиканың 16 муниципалитетында инфекцияләнгәннәр барлыгы ачыкланды.

Шулай итеп, 2021 елның 4 ноябренә булган мәгълүматлар буенча, төбәктә пандемия башланганнан бирле авыруның 31 514 очрагы рәсми рәвештә расланган. Татарстанда 25 771 кеше авырудан савыкты, шулардан 147 кеше узган тәүлек эчендә сәламәтләнде.

Тулаем алганда, 1 652 023 татарстанлы коронавирустан вакцинация алды. Прививка ясатучылар саны көнгә  22 320 кеше булган. Республиканың 1 073 546 кешесе вакцинаның ике дозасын алган.

фото: «Татар-информ» МА