Россиядә коронавирусның «кракен» дигән яңа төрен йоктыруның беренче очрагы теркәлгән

Россиядә коронавирусның омикрон-штаммының яңа варианты - «кракен» белән зарарлануның беренче очрагы ачыкланган. Бу хакта РИА Новости агентлыгы Россия Кулланучы хокукларын яклау һәм кеше иминлеге өлкәсендә күзәтчелек федераль хезмәтенең (Роспотребнадзор) матбугат хезмәтенә сылтама белән хәбәр итә, дип яза «Татар-информ» МА.

«Кракен» вариантын йоктырган беренче пациент Пенза өлкәсендә теркәлгән. Аны VGARus илкүләм базасына көн саен кертелә торган SARS-CoV-2 геномнарын секвенацияләү мәгълүматларын мониторинглау ярдәмендә ачыклаганнар.

Хәзерге вакытта Россиядә «омикрон»ның ВА.5 линиясе өстенлек итә, дип искәрттеләр Роспотребнадзорның матбугат хезмәтендә.

Фото: «Татар-информ» МА