Район башлыгы Сергей Димитриев Питрау бәйрәме белән тәбрикли

Район башлыгы Сергей Димитриев Кукмара районында яшәүчеләрне һәм кунакларны Питрау бәйрәме белән котлады.

«Кукмара районында яшәүче хөрмәтле керәшен якташларыбыз, районыбыз кунаклары! Үзенә генә хас йолаларны, гореф-гадәтләрне саклап яшәүче керәшен халкы бик матур һәм үзенчәлекле булган Питрау бәйрәмен үткәрә. Питрау, дини бәйрәм кысаларыннан чыгып, күпмилләтле районыбыз халкының яраткан бәйрәмнәренең берсенә әверелде. Гасырлар дәвамында халыкның тарихын, динен, яшәеш үзенчәлекләрен үзенә сеңдергән Питрау елдан-ел яңадан-яңа бизәкләр белән тулыланып бара. Аның кабатланмас рухы, сый-хөрмәте, юмартлыгы, бәйге-җиңүләргә җилкендерүе, кызыклы йолалары сокландыра. Питрау ул — җыр, моң, табигать, чәчәк бәйрәме. Нәкъ менә шушы көнне табигатьтә зур үзгәрешләр күзәтелә. Авыл тормышында Питрау аеруча мөһим, үзенчәлекле, чөнки бәйрәмнән соң эш арта. Ә җәй исә — авыл халкы өчен көзгә-кышка әзерлек чоры. Һәр керәшен өчен кадерле булган Питрау бәйрәме күңелләрегезгә тынычлык, яктылык һәм киләсе көнгә ышаныч өстәсен. Дөньялар имин, үзегез сау-сәламәт, бәхетле булыгыз», — диелә котлауда.