Нырты җирлегендә хисап җыелышы узды

Районда халык җыеннары дәвам итә. Кичә ул Нырты авыл җирлегендә узды. Җирлек халкы белән район Башкарма комитеты җитәкчесе Азат Гарифуллин җитәкчелегендәге төркем очрашты. Анда авыл җирлеге башлыгы Тахир Котдусов, район ЮХИДИ бүлеге начальнигы Фирдүс Фәхретдиновларның чыгышлары тыңланды.

Район Башкарма комитеты җитәкчесе Азат Гарифуллин районда дәүләт программаларының үтәлеше, сәнәгать һәм авыл хуҗалыкларындагы икътисади күрсәткечләр, алда торган бурычлар белән таныштырды. Чыгышлардан соң хезмәт алдынгылары бүләкләнде. Шулай ук сорауларга җавап бирелде. Җирлек халкын юлларның төзеклеге, урамнардагы ут баганаларында лампочкаларның яну вакыты һәм башка сораулар борчый.

Җирлектә барлыгы 243 хуҗалыкта 796 кеше яши. 2023 елда 2 бала туган, 9 кеше вафат булган. Хезмәткә сәләтле 313 кешенең 205е авыл хуҗалыгында, 48 кеше бюджет өлкәсендә эшли. Шулай ук биредә эшмәкәрләр, фермерлар, читкә китеп эшләүчеләр дә бар.

«Җирлек халкының күбесе мал асрый. 160 мөгезле эре терлекнең 81е — савым сыерлар», — дип сөйләде Таһир Котдусов.

Шулай ук ул дәүләт, үзара салым программалары буенча башкарылган эшләргә дә тукталды.

фото: Ризилә Корбанова/ «Хезмәт даны»