«Бердәм Россия» көне кысаларында Дәүләт Советы депутаты Данис Шакиров Кукмарада халыкны кабул итте

Бүген, «Бердәм Россия» көне кысаларында ТР Дәүләт Советы депутаты Данис Шакиров Кукмара гражданнарын кабул итте. Бүленгән вакыт эчендә депутат 4 кешенең гозерен тыңларга өлгерде. 

Депутат белән очрашуга Кызыл тау авылыннан Никонор Федоров килгән. Никонор Алексеевичның авыл халкы, яхшы күңелле кешеләрнең ярдәме белән Кызыл тау авылында чиркәү торгызу эше белән йөргәнен газета битләрендә яктырткан идек инде. Хәзерге вакытта чиркәүгә ишек-тәрәзәләр куярга кирәк. Ә бу авыл халкы өчен зур гына булган чыгымнар таләп итә. Шуңа да Никонор Федоров Дәүләт Советы депутатына матди яктан ярдәм оештырып булмасмы дигән үтенеч белән мөрәҗәгать итте. 

Иске Каенсар авылыннан Ринат Исланович төзеләчәк ФАПның урыны халык өчен уңайлы булсын иде дигән мәсьәләне күтәреп чыкты. Ике авылга хезмәт күрсәтергә тиешле медпунктның авыллар арасында урнашырга тиешлеген исбатлады ул, чөнки болай булганда авыл халкы өчен күпкә җайлырак булыр иде диде. 

Шулай ук Иске Каенсар авылында яшәүче Павел Байметовны Поч. Сутер һәм Иске Каенсар авыллары арасында юлларның начар булуы борчый. Җирлектәге су башнясының күптәннән чистартылмаган булуы да авыл халкына тыңгылык бирми икән. 

Кукмара шәһәреннән Диләрә Гарипова Данис Фанисовичтан инвалид улын торак белән тәэмин итү мәсьәләсендә булышлык итүен үтенде. 

Дәүләт Советы депутаты Данис Шакиров һәркемнең үтенечен тыңлап, әлеге мәсьәләләрне үз игътибарына алды.