Кукмарада шәхси йортта зур янгын чыккан

13 октябрьдә, 13:55 сәгатьтә 117нче янгын-коткару частеның элемтә пунктына Глонасс-112 системасы буенча Кукмара шәһәренең Җәлилчеләр урамында янгын чыгуы турында хәбәр алына. Бу хакта районның 117нче янгын сүндерү-коткару частенда хәбәр иттеләр.

Янгын сүндерүчеләрне йорт хуҗасы каршы ала һәм йорт, каралты-куралар эчендә беркем дә юклыгын әйтә. Веранда, торак йорт, мунча түбәләре һәм гаражның чормасы ачык ут белән яна торган була. Алга таба ялкынның күрше йортларга таралу куркынычы да була.

Нәтиҗәдә 152 квадрат метр мәйданда чорма, торак йортның өлешчә эчке ягы һәм гараж түбәсе кара күмергә әйләнә. Алга таба янгынның күрше торак йортларга таралуына юл куелмый. Зыян күрүчеләр һәм һәлак булучылар юк.

Янгынның сәбәпләрен белгечләр ачыклаячак.

Фото: 117нче янгын-коткару часте