Кукмарада полиция хезмәткәрләре каракны тоткарлаганнар

Полиция хезмәтенә Магистральный урамындагы шәхси йортларның берсенә чит кеше керүе турында хәбәр алына. Әлеге хәл булган урынга полиция хезмәткәрләре килгәч, йорт хуҗасы 24 июньнән 25енә каршы төндә билгесез ирнең, веранда тәрәзәсе рамын алып, өйгә үтеп керүен һәм 15 мең сумлык кесә телефонын, кием һәм 3 пычакны урларга маташуын әйтә. Начар ниятле ир полиция хезмәткәрләре тарафыннан шунда ук тоткарлана. Тикшерү барышында аның 54 яшьлек  булуы, элек хөкем ителгәнлеге, район авылларының берсендә яшәве ачыклана. Угрылыкта шикләнелүчегә карата җинаять эше ачылып, кулга алына. Мондый җинаять өчен законда иң зур җәза – 6 елга кадәр иректән мәхрүм ителү каралган.