Кукмарада хатын-кызга пычак белән кадаган ир-ат хөкем ителгән

Агымдагы елның 15 гыйнварында кичке сәгать дүртләр тирәсендә Нур Баян урамындагы бер йортта элек тә хөкем ителгән 63 яшьлек Кукмара кешесе, үзе белән бергә торучы хатын-кыздан көнләшеп, исерек хәлдә аңлы рәвештә аш-су пычагы белән аның күкрәгенә кадаган. Нәтиҗәдә, хатын-кыз яраланып, сәламәтлегенә зур зыян килгән.

Ир-атка каты режимлы төзәтү колониясендә 2 ел да 6 ай ирегеннән мәхрүм ителү җәзасы билгеләнгән.

Хөкем карары үз көченә керде.

Район судының матбугат хезмәте

фото: "Татар-информ"