Кукмарада яшәүче элеккеге тормыш иптәшенә үтерү белән янаган өчен суд каршына басачак

Кукмара районы прокуратурасы 41 яшьлек ир-атка карата җинаять эше буенча гаепләү актын раслады. Ул кешегә үтерү белән янауда гаепләнә.

2022 елның 16 ноябрендә гаепләнүче үз өендә спиртлы эчемлек эчә. Шул вакыт ул аерылышканнан соң да бергә яшәүче хатыны белән бәхәскә керә. Конфликт вакытында ир тәлинкә ала, үтерү белән янап, аны хатынның йөзенә ата һәм борынына зыян китерә.

Җәнҗал балигъ булмаган балалар алдында була.

Ир үз гаебен таныды. Җинаять эше җәмәгать судьясына җибәрелде.