Кукмарада янгын сүндерүчеләр күнегүләр үткәрде

Кукмарада янгын сүндерүчеләр ашыгыч хезмәтләр белән берлектә район Мәдәният йортында укулар үткәрде.

«Чараның максаты — объектларда янгын сүндерү вакытында шәхси составның оештыру һәм гамәли күнекмәләрен тикшерү, янгын нәтиҗәсендә зыян күрүчеләрне эвакуацияләгәндә ашыгыч хезмәтләр белән хезмәттәшлек итү», — дип билгеләп узды районның 117нче янгын сүндерү-коткару часте начальнигы Ильмир Хәбибрахманов.

Ул аңлатканча, янгын куркынычсызлыгы таләпләрен бозу нәтиҗәсендә кинотеатр бинасында янгын чыга. Башта бик сизелмәсә дә, алга таба ялкын телләре көчәйгәннән-көчәя. Объект вәкиле сүзләренчә, икенче катта бер кеше калган.

«Подразделениенең дежур каравылы шартлы янгын урынына килде. Зыян күрүчене эзләү башланды. Ул кино залында табылды һәм ашыгыч ярдәме күрсәтү бригадасына тапшырылды», — диде Ильмир Хәбибрахманов.

Укытуга 51 кеше һәм 10 берәмлек техника, шул исәптән Гадәттән тыш хәлләр министрлыгыннан 35 кеше һәм 6 берәмлек техника җәлеп ителгән.

Янгын сүндерү бүлекчәләренең һәм район Мәдәният йорты хезмәткәрләренең үзара килешеп башкарган гамәлләре нәтиҗәсендә янгын тиз арада юкка чыгарылды. Күнегүләр барышын күзәткән һәм бәяләгән белгечләр, чара тәмамланганнан соң, җентекле анализ үткәрде. Аларның фикеренчә, күнегүдә катнашучыларның барысы да грамоталы, килешкән төстә гамәлләр үтәп, куелган бурычны уңышлы башкарып чыкты.

Фото: Эльвира Иванова/ «Хезмәт даны»