Кукмара районы прокуратурасы гражданнарның торак хокукларын яклауга кереште

Кукмара районы прокуратурасы Восточная урамы, 3нче йортта яшәүченең мөрәҗәгате буенча тикшерү үткәрде. Ул торак шартларының начар булуыннан зарлана.

Кукмара шәһәренең Восточная урамында урнашкан 1, 3, 3А йортларында 7 гаилә яши. 2020 елда алар йортларын авария хәлендә дип тану турында гариза белән район Башкарма комитетына мөрәҗәгать итә.

Нәтиҗәдә 1нче номерлы йорт авария хәлендә дип табыла, анда яшәүчеләрне вакытлыча торак биреп күчерәләр.
2020 елның 1 декабрендә 3 һәм 3А номерлы йортлар да яшәү өчен яраксыз дип табыла, әмма аларның авариялелек мәсьәләсе әлегә кадәр хәл ителми.

Шулай итеп, югарыда күрсәтелгән йортларны авария хәлендә дип тану турында гражданнарның гаризалары каралмый, торак хокуклары бозыла.

Хокук бозуларны бетерү максатыннан, прокуратура район һәм шәһәр башкарма комитетларының җитәкчеләре адресына гомумиләштерелгән күрсәтмә кертте.

Прокурор реакциясе акты карау стадиясендә.