Кукмара прокуратурасы сирәк хайваннарны ауларга өйрәтә торган сайтларны ябуны таләп итә

Кукмара районы прокуратурасы сирәк хайваннарны ауларга өйрәтүче сайтларны ябуны таләп итә. Бу хакта Кукмара районы прокуратурасыннан хәбәр иттеләр.

Интернет челтәрен күзәтү барышында район прокуратурасы Россия Федерациясенең Кызыл китабына кертелгән аеруча кыйммәтле кыргый хайваннарны аулау ысуллары турында мәгълүмат урнаштырылган 2 сайтны ачыклаган.

Әлеге электрон ресурсларга керү чикләнмәгән кулланучылар өчен ирекле булган. Аеруча кыйммәтле кыргый хайваннарны аулау закон буенча тыела.

Күзәтчелек ведомствосы интернет-ресурсларда урнаштырылган әлеге мәгълүматны Россия территориясендә тарату тыелган булуын тану турында судка гариза җибәрде.

Гариза карау стадиясендә.