Хак сүзләр

Әтинең әйткән сүзләре еш искә төшә, алар бик олы мәгънәгә ия. Кайткач, бер кеше турында сөйләшеп утырганда: “Бик юаш бит ул, кая аннан җитәкче чыксын”, - дигән сүзләремә каршы аның: “Син, улым, кешегә бервакытта да юаш дип карама. Ул никадәр юаш булса да, аның киресе үзенә генә түгел, ә башкаларга да җитә”, - дип әйтүе тормыш тәҗрибәсе белән күп тапкыр исбатланды.

Әти миңа: “Олыгайган көнебездә синең егетлегеңне күргән-белгән кешеләр белән гомер итәргә язсын”, - ди иде. Чыннан да, еллар узган саен, синең егәрле вакытыңны, башкарган эшләреңне белүче замандашлар кими барса, яшьләргә инде син кызык түгел.
 “Алганчы-барганчы бик уйла, син булачак тормыш иптәшеңнең тискәре якларын яши торгач үзгәртермен әле дип өметләнмә, еллар үткән саен, алар көчәя генә, шуны онытма”, - дип әйтә иде әтием.

Тормыш тәҗрибәләре, күзәтүләре моны бер исбатласа, бөек дин белгече Муса Бигиев иҗаты икенче тапкыр дәлилләде. Ул, ислам динендәге Коръән һәм хәдисләргә таянып, хатын-кызлар турындагы әсәрендә шундый мисал китерә: Мөхәммәт пәйгамбәр янына күршесе керә, хатынының аны тыңламавын, үз киресен эшләвен әйтә һәм, ничек тыярга, дип киңәш сорый. Пәйгамбәребез: “Хатыннар ирләр кабыргасының иң катлаулы, кәкре өлешенә охшаш итеп яратылганнар. Син аларны турайтырга тырышма, барыбер килеп чыкмас – сынарга гына мөмкиннәр. Шуңа да без аларны ничек бар, шул килеш кабул итсәк, дөрес булыр”, - дигән. Кара, мәйтәм, безнең әти дә нәкъ шул сүзләрне әйтә иде бит...

Зиннур ЗАКИРОВ, (“Кукмара мәзәкләре” китабыннан)