Балалар Хәтирә Салихова белән очрашуга барды

Ленинград камалышы өзелүгә 75 ел тулу уңаеннан, без 6-7 сыйныф укучылары белән Ленинград камалышында катнашкан Хәтирә апа Салихова белән очрашуга бардык.

Хәтирә апа өч ел буена дошман чолганышында калып, ачлыкны, ялангачлыкны, барлык авырлыкларны үз җилкәләрендә кичергән. Ул, хәтер йомгагын сүтә-сүтә, балаларга бик җентекләп сөйләде. Аның күңелендә ул вакытларның һәр көне, һәр мизгеле сакланып калган.

Укучылар аны тын да алмый тыңладылар. Исәннәрнең кадерен белик, аларны сөйләтеп калыйк, чөнки сугыш ветераннарыбыз бармак белән генә санарлык калды.

Альбина САЛИХОВА, Өлге авыл китапханәчесе