Һаман яши (шигъри мизгел)

Һаман яши җирдә мәкер, ялган,

Эзе килә ерак еллардан.

Дөнья туйган инде ялганнардан,

Бер мин генәме соң алданган?

Кайберәүләр вәгъдә итә белә,

Вәгъдәләре саллы һәм татлы.

Кешеләргә һаман ышанам шул,

Табигатем шундый - беркатлы.

Татлы сүзләр сөйли белгәннәргә

Ихлас күңел ышана бит һаман.

Хыял күкләрендә йөзгәннәрдән

Каһкәһәләп көлә мәкер, ялган.

Йөрәгемне я су, я ут чорный,

Ничек басып була ялганны?

Кабатланмас! - диеп күңелемдә

Өмет җиле тузгый... алданып...

Суфия Мостафина