Татарстан Дәүләт Советы депутаты Римма Ратникова кукмаралыларны кабул итте

Бүген Кукмарага Татарстан Дәүләт Советы депутаты Римма Ратникова килде. Ул район Советы бинасында кукмаралыларны кабул итте. 

Кабул итүгә язылучылар депутатка үзләрен борчыган проблемалар хакында сөйләделәр, кызыксындырган сорауларны бирделәр. Бер райондашыбыз хәрби пенсионерларны санатор-курортларга бару белән тәэмин итә торган законга үзгәрешләр кертүне сораса, икенчесе ике бүлмәле фатирын тулысынча идәннән түшәмгә кадәр чүп-чар белән тутырган, хәтта өй ишеге ачылмас хәлгә килгән, үзе кайда туры килә, шунда кунып йөрүче, чүплекләрдә актарынып, иске-москы әйберләрне шунда ташучы күршесеннән зарланды.

«Тараканнар, тычканнар ияләште. Безнең түзәр хәлебез калмады. Берәр чара күрергә ярдәм итсәгез иде», — ди ул, ачынып.

Ә менә алдагы сорау бирүчеләр — моннан берничә ел элек «Сәламәтлек» төркеме оештырган пенсионер ханымнар. Алар «Зилант» спорткомплексында спорт белән шөгыльләнү өчен Россия пенсионерлар берлеге аша финанслау мәсьәләсен хәл итүне сорый. 

Бер генә мөрәҗәгать тә игътибардан читтә калмады. Римма Ратникова һәркемне игътибар белән тыңлады, сорауларны язып алды.

Фото: Алсу Сәләхетдинова/ «Хезмәт даны»