Кукмарада район башлыгының Чыршы бәйрәме узды

Матур традициягә тугъры калып, ел саен балалар өчен район башлыгының Чыршы бәйрәме оештырыла. Быел анда уку алдынгылары, спорт, мәдәният һәм башка өлкәләрдә уңышларга ирешкән укучылар, мобилизацияләнгән райондашларыбызның, хәрби хәрәкәт ветераннарының балалары чакырылган иде.

Балаларны район башлыгы Сергей Димитриев котлады һәм үзенең изге теләкләрен ирештерде.

«Сез төрле ярышларда, конкурсларда районыбыз данын яклыйсыз. Җиңүләрегез белән аның үсешенә зур өлеш кертәсез. Тырышлыгыгыз, җиңүләргә омтылышыгыз, уңышларыгыз өчен рәхмәт. Яңа ел ул һәркем өчен әкияти сихри бәйрәм һәм шулай булып калачак та. Яңа елда барлык хыяллар да чынга ашсын», — диде Сергей Димитриев.

Чыршы бәйрәменнән һәр бала искиткеч матур тамаша карап, бүләкләр алып таралышты.

фото: Алсу Сәләхетдинова/ «Хезмәт даны»