Кукмара паркында тиеннәр яши башлады

Кукмара шәһәренең Атлас Булатов исемендәге мәдәният һәм ял паркында матур, йомшак йонлы җәнлекләр пәйда булды: территориядәге махсус әзерләнгән вольерга өч тиен җибәрелде.

«Безнең паркта өч Алтай тиене яши башлады. Алар агач өйләре булган, җимлекләр куелган махсус вольерга урнаштырылды. Шулай ук әлеге энергияле җәнлекләр уйный алырлык тәгәрмәч дә урнаштырачакбыз», - дип сөйләде шәһәр башкарма комитеты җитәкчесенең урынбасары Ринат Хәйруллин.

Тиеннәрнең икесе - кыз, берсе - малай. Аларны карау белән Нурлыхода Минһаҗева шөгыльләнәчәк. Ул парктан ерак түгел яши һәм алты ел дәвамында бу территорияне тәртипләп тора.

Тиеннәргә чикләвек, кишер, алма һәм башка продуктлар ашатачаклар.

Район халкы һәм кунаклар да тиеннәрне сыйлый ала. Әмма моның өчен белешмәлекне укырга, игътибар белән өйрәнергә кирәк, анда тиеннәргә нәрсә ашатырга ярамавы һәм җәнлекләрнең нәрсә яратуы турында язылган. Алар өчен тәкъдим ителгән рацион язылган махсус табличкалар вольерда урнаштырылган.

Фото: Эльвира Мөбарәкшина/ «Хезмәт даны»