Түләү квитанцияләрен ничә ел сакларга? (сорау-җавап)

-Газета аша бер сорауга җавап аласым килә. Мөгаен, мине генә түгел, күпләрне кызыксындырадыр ул. Без ай саен берничә оешмага түләүләр түлибез, аларның квитанцияләре җыелып бара. Өебездә инде 2005 елларда ук түләнгән квитанцияләр саклана. Ташларга куркабыз. Компьютерларда, русча әйтсәк, "сбой" була калса, түләгәнебезне ничек расларбыз дип борчылудан җыелган кәгазьләр инде ул. Өйдә ничә еллык квитанцияләр сакланырга тиеш икән?

Рәхимә ХӘСӘНОВА

Владислав МИХАЙЛОВ, "Бердәм исәп-хисап үзәге" ширкәте директоры:

-Россия Хөкүмәтенең 6.05.2011елгы 354санлы карарында әйтелгәнчә, коммуналь хезмәтләр өчен түләүләрне раслаучы документларны, түләгән көннән алып, ким дигәндә өч ел сакларга кирәк. Шулай ук Россия Федерациясе Гражданлык Кодексында "дәгъва срогы" дигән төшенчә бар, ягъни бозылган хокукны яклау өчен өч ел эчендә судка мөрәҗәгать итәргә була.

Кукмара газ оешмасы җитәкчесе Марат БОРҺАНОВ та дәгъва срогының 3 ел булуы турында әйтеп үтте.

Татьяна ЕРЫЧЕВА, "Татэнергосбыт"ның Алабуга бүлеге начальнигы урынбасары:

-Коммуналь хезмәтләр өчен түләүләр турындагы квитанцияләрне саклау срогы турында закон юк. Әмма РФ Гражданлык Кодексында 3 еллык дәгъва срогы каралган. Бурычларны түләтү өчен дә срок - 3 ел. Әмма квитанцияләрне мөмкин булганча озаграк сакларга кирәк, чөнки дәгъва срогының бетүе судка мөрәҗәгать итү өчен киртә була алмый. Икенче төрле әйткәндә, дәгъва бирү хокукы өч ел үткәннән соң да саклана. Ник дигәндә, суд тикшерүе барышында дәгъва срогының өзелгән, туктатып торылган булуы яки яңадан кайтарылырга тиешлеге ачыкланырга мөмкин. Әгәр җавап тотучы дәгъва срогы үтүенә сылтый, суд бу срокны өзү яки туктатып тору өчен нигез тапмый икән, дәгъва канәгатьләндерелми.

Ә кулланылган электр энергиясе өчен үзвакытында түләргә кирәклеген онытмагыз.