Кукмара үзенең һөнәрле, кәсепле халкы белән дан тота

Соңгы елларда эшмәкәрлек белән шөгыльләнүчеләр саны да артканнан арта бара. Алар терлек асрый, яшелчә үстерә, икмәк һәм камыр ризыклары пешерә, башка төр азык-төлек, төзелеш материаллары, өй җиһазлары, йорт кирәк-яраклары җитештерә, халыкка сәүдә һәм башка төр хезмәтләр күрсәтә. Бүген районыбызда шәхси эшмәкәрләрнең һәм кече предприятиеләрнең саны 1300дән артып китә.

Ә районыбыз горурлыгы булган металл савыт-сабалар заводы, киез итек-киез комбинаты, тегү фабрикасы продукциясе инде күптән республика чиген үтеп чыкты. Кукмара табаларын чит илләрдә дә яратып кулланалар.

1990-2000 елларда үзгәртеп кору шаукымы, оптимальләштерү сәясәте нигезендә яки банкротлыкка чыгу сәбәпле, районда эшләп килүче күп кенә оешмалар ябылды. Әмма тормыш бер урында таптанмый: алар урынына яңа төзелеш, производство оешмалары, кече предприятиеләр калкып чыкты. Кайберәүләрдән: "Нигә Кукмарага башка район оешмалары килеп эшли, үзебезнекеләргә дә эш җитми бит", - дигән сүзләрне ишетергә туры килә. Бу да - заман таләбе: хәзер дәүләт заказы нигезендә башкарылучы һәрбер эшкә аны үтәүчеләр конкурс нигезендә сайлап алына, әлеге конкурста һәр эшмәкәр катнашырга хокуклы.