Кукмара районы ветераннары кичке шәһәр буенча экскурсиягә чыкты

Районның актив ветераннары, "Россия пенсионерлар берләшмәсе" иҗтимагый оешмасының җирле бүлек әгъзалары оешма җитәкчесе Артур Зәкиев һәм урынбасары Римма Әхмәдиева белән берлектә кичке Кукмара буенча экскурсиягә чыктылар. Алар шәһәребезнең бизәлешен карадылар. Кукмара киез итек-киез комбинатында, металл савыт-сабалар заводында, тегү фабрикасында, чаңгы шуу комплексында булып, 2017 елда башкарылган эшләр белән таныштылар. Артур Зәкиев экскурсиядә катнашучыларны райондагы яңа төзелешләр белән таныштырды, ә Римма Әхмәдиева "Син Кукмараны беләсеңме?" дигән конкурс-викторина әзерләгән иде. Экскурсия һәркемдә күңелле хатирәләр калдырды.