«Экология» илкүләм проекты ярдәмендә урман янгыннарын сүндерә торган яңа станцияләр барлыкка киләчәк

2020 елда республикада «Урманнарны саклау» төбәк проекты кысаларында Түбән Кама һәм Нурлат урман хуҗалыклары базасында ике яңа урман янгынын сүндерү станциясе барлыкка киләчәк. Ул «Экология» илкүләм проекты ярдәмендә гамәлгә ашырыла.

Шулай ук быел урман янгыннарын сүндерү өчен 12 берәмлек техника һәм җиһазлар - тугыз янгын сүндерү автоцистернасы, кече урман-патруль комплексы һәм янгынга каршы югары басымлы җайланма сатып алыначак.

Бүгенге көндә урманнарда янгын куркынычсызлыгын урман хуҗалыклары карамагында эшләүче II типтагы 18 урман янгынын сүндерү станциясе һәм Татарстанның «Урман янгынын сүндерү үзәге» дәүләт бюджет учреждениесе карамагында эшли торган III типтагы 5 урман янгынын сүндерү станциясе тәэмин итә.

Татарстан Республикасында урманнар биләгән территорияләрнең гомуми мәйданы 1 миллион 271 мең гектарны тәшкил итә, урманлык — 17,5 процент.

Татарстанда 2011 елдан бирле урман янгыннары теркәлгәне юк.