2022 елда Татарстанда бизнеска ярдәм итү өчен 4,5 млрд сум юнәлтелгән

Быел Татарстанда «Кече һәм урта эшмәкәрлек һәм шәхси эшмәкәрлек инициативасына ярдәм итү» илкүләм проектын гамәлгә ашыру дәвам итә. Аның нигезендә эшмәкәрләргә ел башыннан барлыгы 4,5 миллиард сумлык ярдәм күрсәтелгән, дип яза «Татар-информ» МА.

Бу акчалар ташламалы финанслау, җаваплылыкны өскә алу, субсидияләр түләү, мәгълүмати ярдәм һәм консультацияләр бирү кебек программаларга юнәлтелде, дип хәбәр итә ТР Икътисад министрлыгы матбугат хезмәте.

Моннан тыш, Татарстан Президенты Рөстәм Миңнеханов күрсәтмәсе буенча, санкцияләр белән бәйле чикләүләр булган шартларда республика тарафыннан да ярдәм чаралары тәкъдим ителә. Бүген иң зур ихтыяҗ – ташламалы микрофинанслау.

Республиканың Эшмәкәрлеккә ярдәм итү фондына быел эшмәкәрләрдән 1198 гариза килгән. Алар буенча эшмәкәрләргә 1 миллиард сумлык 579 микрозайм бирелгән.