Кукмараның Ломоносов урамында яшәүчеләр күршеләр бәйрәме уздырган

Америка Кушма Штатларына күченеп киткән авылдашыбыз, кунакка кайткач, безнең өйгә дә хәл-әхвәлләребезне белергә килде.

-Күршеләрегез нинди кешеләр анда, аралашасызмы? - дип соравыбызга:

-Очраганда елмаеп сәламлиләр. Мөнәсәбәтләребез шуннан ары узмый. Ә өйләренә керү өчен башта телефоннан шалтыратып, рөхсәт сорарга, керү вакытын билгеләргә кирәк. Шәхси территориягә рөхсәтсез аяк басу җинаять булып санала, - дип җавап бирде.

Абау, ничек яшәмәк кирәк алай? "Заманнар үзгәрә, күршеләр үзара аралашмый башлады", - дип зарланулар ишетелсә дә, шөкер, бездә хәлләр Америкадагыча түгел. Йомыш төшсә дә, моң-зарны түгәргә дә күршеләргә йөгерәбез. Кайгы-хәсрәт килгәндә дә алар ярдәмгә килә. Кыскасы, җырда җырланганча, күршеләр - иң якын кешеләр.

27 май - Халыкара күршеләр көне икәнен белмәүчеләр дә бардыр әле. Ә менә Кукмара поселогының Ломоносов урамында яшәүчеләр инде берничә ел рәттән бу көнне җыелышып билгеләп үтәләр икән.

-Урамыбыз бик ямьле, тыныч, машиналар да сирәк үтә, капка төпләре яшел чирәм. Бәйрәмне, каядыр бармыйча, шушында гына оештырабыз, - дип сөйли Мәрьям Сәлахетдинова. - Кемдер, казан асып, балык шулпасы әзерли, кемдер шашлык кыздыра. Күмер самавырында чәй кайнап утыра. Табынга төрле тәм-томнар, каклаган каз яки үрдәк, салатлар, җиләк-җимеш, яңа пешкән камыр ризыклары тезелә. Бу күңелле мәшәкатьләр эчкерсез аралашу, уен-көлке белән үрелеп бара. Фәрит гармун күтәреп чыга, җыр-биюләр башлана. Табын артына утыргач та, сөйләр сүзләр бетми, кызыклы вакыйгалар, хатирәләр барлана. Бер зур гаилә итеп тоябыз үзебезне.

-Бу урамга күченеп килгәнебезгә алты ел булды инде. "Иң әүвәле йорт сатып алганчы, күрше сатып ал" дигән бит ата-бабаларыбыз. Шөкер, күршеләребез шулкадәр әйбәт, бик рәхәт яшибез. Бер-беребезгә барлык кирәк-яракка керәбез, язын яшелчә, чәчәк кәлшәләре алмашабыз. Бергәләп бәйрәм үткәрү дә матур гадәткә әверелде, быел да бик күңелле итеп утырдык, - ди Фәүзия Фәйзуллина.

- Терәлеп торган күршеләребез (йортыбыз ике яклы) Рәмзия һәм Сергей Петровлар белән бергәләп өйләрне заманча материал белән тышладык, - дип өсти тормыш иптәше Мөбарәкҗан.

Любовь һәм Анатолий Тимофеевлар, Хәлимә һәм Рамазан Юнысовлар, Рәмзия һәм Газинур Кашаповлар - барысы турында җылы сүзләр генә ишеттем.

-Киләсе елда да бәйрәм итәргә сүз куештык. Кунакка килерсез, - дип күңелне эретте Мәрьям ханым.

Чакырган җиргә бармый булмас, мөгаен. Иң мөһиме: исән-сау булуыбыз кирәк.

Редакциядән. Ә сез күршеләрегез белән аралашып яшисезме? Аларның бигрәк тә кайсы сыйфатлары ошый? Шул хакта сездән язмалар көтеп калабыз.