"Ак калфак"лылар өлкәннәргә җиләк өләште

Җәй үзе белән бик күп мәшәкать алып килсә дә, вакытны дөрес бүлгәндә барысына да -эшкә дә, ял итәргә дә җитешергә мөмкин. Җиләккә барырга вакыт тапмасаң, җәйнең ямен күрми калган кебек булырсың. Ә быел җир җиләгенең күплеге! Аллаһы Тәгаләнең безгә биргән нигъмәте бу.
Районның "Ак калфак" оешмасы җитәкчелегендә без дә бергәләп җиләккә барып кайттык әле. Үзебез арасында ярыш оештырдык: кемнең савыты тизрәк тулыр? Бу яктан эшмәкәр ханым Ясирә Гарифуллинага тиңнәр булмады.
Бу көнне җыйган җиләгебезне без өлкәннәргә өләштек. Иң элек табигать күчтәнәченнән Әсән-Елга авылында яшәүче сугыш ветераны Каим абый Җиһаншин авыз итте. Кукмараның Комаров урамында яшәүче Рәйдә әби безне: "Балакайларым, җиләк ашыйсы килгәнемне кайлардан белдегез? Ялгыз гына яшим, аякларым бик сызлый, җиләккә йөри алмыйм хәзер," - дип каршы алды да, рәхмәтләр әйтеп озатып калды. Ә Мәгъшия әбинең күзләреннән сөенеч яшьләре акты. Кешене сөендерү өчен күп кирәкми шул...
Рафилә ФӘТТАХОВА, Кукмара поселогы