Юл фаҗигасендә 50 яшьлек пассажир һәлак булган

(Казан, 16 июль, "Татар-информ"). Зәй районында иномарка, капланып, түбәсенә яткан, ике кеше зыян күргән, дип хәбәр иттеләр "Татар-информ"га Россия Гадәттән тыш хәлләр министрлыгының Татарстан Баш Идарәсе матбугат хезмәте.

41 яшьлек "Шевроле Нива" йөртүчесе Старое Пальчиково авылы янында машина белән идарә итә алмыйча, юл кырыена төшеп китә.

Автомобиль салонында утырган 50 яшьлек Чаллы кешесе урында вафат була. Руль артындагы кеше җитди җәрәхәтләр белән хастаханәгә озатыла.

Фаҗига урынына Гадәттән тыш хәлләр министрлыгы хезмәткәрләре, полицейскийлар һәм медицина хезмәткәрләре килә.