Юл иминлеге гаиләдән башлана: Кукмарада «Буыннар старты» бәйгесенең җиңүчеләре ачыкланды

Манзарас урта мәктәбендә «Буыннар старты» республика бәйгесенең район этабы үтте. Анда гаилә командалары көч сынашты. Команда составында бала, әти-әни, өлкән буын вәкиле бар иде.

Чараны «Юл хәрәкәте иминлеге» учреждениесенең район бүлеге, дәүләт автоинспекциясе, мәгариф идарәсе, автомәктәп, 117нче янгын сүндерү-коткару часте, «Галактика» балалар иҗат үзәге оештырды. 

«Юл хәрәкәте иминлеге» учреждениесенең район бүлеге җитәкчесе Елена Яковлева сүзләренә караганда, катнашучылар 11 этапта гамәли һәм практик биремнәр үтәгән.

«Бәйге барышында балалар, әти-әниләр, өлкәннәр беренче медицина ярдәме күрсәтү, юл йөрү кагыйдәләрен белү, велосипедта һәм автомобильдә фигуралы йөрү, тормыш иминлеге нигезләре, янгын куркынычсызлыгы буенча үзләренең белемнәрен күрсәтте», — дип билгеләп үтте Елена Владимировна.

Барлык этапларны узганнан соң, беренче урынга Әхмәдуллиннар гаиләсе чыкты. Икенче-өченче урыннарны Мостафиннар, Галимовлар гаиләләре бүлеште. Җиңүчеләргә истәлек бүләкләре тапшырылды.

Фото: Елена Яковлева