Сергей Димитриев өч яшь кукмаралының хыялын тормышка ашырды

Район башлыгы Сергей Димитриев «Теләкләр чыршысы» акциясендә катнашты һәм өч яшь кукмаралының хыялын тормышка ашырды. 

9 яшьлек Дамианның ике яшь тулгач, кинәт күз күрүе начарлана. Хәзер ул Кукмара 3нче урта мәктәбенең 3 сыйныфында укый. Актив һәм шат күңелле малайның яраткан фәннәре әйләнә-тирә мохитне өйрәнү, туган тел, математика. 

«Бассейнга йөрим, судомодельләштерү һәм агач эшкәртү буенча түгәрәкләргә йөрим. Кыш бабайдан пульт белән идарә итә торган машина һәм Лего конструкторы сораган идем», — ди Дамиан. 

«Узган ел улыбыз Лесхозда физик мөмкинлеге чикле балалар арасында судомодельләштерү буенча узган шәхси-команда ярышларының зона этабында икенче урын яулады. Әлеге акциядә дүртенче ел рәттән катнашабыз, оештыручыларга рәхмәт», — диде әнисе Людмила. 

Бүген Сергей Димитриев малайның хыялын тормышка ашырды. Әхтәмовлар гаиләсендә ике ир бала тәрбияләнә, олысы Даниилга — 12 яшь.

Район башлыгы Сергей Димитриев Кукмарада яшәүче Данил Федоренкога да бәйрәм бүләге һәм сертификат тапшырды. 

Данил күппрофильле лицейның икенче сыйныфында укый, рәсем ясарга, робот техникасы белән шөгыльләнергә ярата. Шулай ук ул алмаз мозаикасы белән картиналар да ясый.

«Безнең өйдә „Мусик“ исемле песиебез бар. Аның белән мәктәптән кайткач гел уйныйм. Кыш бабайга хатны инде күптән яздым. Әмма аннан нәрсә соравымны әйтә алмыйм, сер булып калсын. Алайса ул чынга ашмаячак», — ди Данил. 

Данил — гаиләдә икенче бала. Аның 7 сыйныфта укучы абыйсы бар. 

«Нинди генә эшкә тотынсам да, Данил миңа ярдәм итәргә ашыга. Без хәтта бергәләп камыр ризыклары пешерәбез. Тыныч, мәрхәмәтле ул безнең. Мәктәпкә дә, „Шәфкать“ тернәкләндерү үзәгенә шөгыльләргә дә теләп йөри. Улымны сөендергән өчен район башлыгы Сергей Димитриевка бик рәхмәтлебез. Яңа елда һәркемнең уй-хыялы тормышка ашсын», — ди әнисе Римма ханым.

Район башлыгы Сергей Димитриев район үзәк дәваханәсенең хирургия бүлегендә дәваланучы 12 яшьлек Данилның да теләген чынга ашырды. 

Малай авыру булып, җитлекмичә туа. 1.9 елдан соң гаилә Кукмарага күченергә була. «Чиста саф һава улыбызның сәламәтлегенә уңай йогынты ясый», — ди әнисе Зөлфия Гобәева.

Данил — шат күңелле, максатчан бала. Ул бүгенге көндә Кукмара 4нче мәктәбенең 5 сыйныфында укый, шулай ук IT юнәлеш буенча Мәскәү онлайн-мәктәбендә дә белем ала. 

«Игътибар һәм теләктәшлек өчен барлык укытучыларга да рәхмәт», - ди әнисе. 

«Мин математика, тарих фәннәрен яратам, программалаштыру белән мавыгам. Инде үземнең программаларны да булдыра башладым», — диде Данил.