Лубянда “Урман чаңгы юлы-2025” спартакиадасы узды

Лубян авылына бүген чаңгы спортын үз итүчеләр җыелды. Биредә республиканың урман хуҗалыгы тармагы хезмәткәрләре арасында “Урман чаңгы юлы-2025” дигән чаңгы ярышлары үтте. Чарада 200дән артык кеше катнашты.

Ярышларда катнашучыларны Татарстан Республикасы Урман хуҗалыгы министры урынбасары Рәис Гомәров, район яшьләр эшләре һәм спорт идарәсе җитәкчесе Илсур Кәшәпов, Лубян урман-техник көллияте директоры Рим Фәхразиевлар сәламләде. 

 - “Урман чаңгы юлы-2025” ярышлары быел унбишенче тапкыр үткәрелә. Урман хуҗалыгы тармагы белгечләре, хезмәттәшләр бирегә килеп чаңгы ярышында катнаша. Әлеге спорт бәйрәме көч сынашу гына түгел, ә очрашу, дуслашу, аралашу урыны да булып тора. Быел да бердәм булып 200дән артык кеше килде. Агымдагы ел Россия Президенты һәм Татарстан Рәисе тарафыннан “Ватанны саклаучылар” елы дип игълан ителде. Чаңгы ярышын бүгенге көндә махсус хәрби операция зонасында, алгы сызыктагы хәрбиләргә багышлыйбыз. Барлык җиңүләр дә алар хөрмәтенә булсын. Көн бик матур, спортчыларны сәламләп кояш балкый. Һәркемнең трассаны уңышлы узуын телим, - диде Рәис Гомәров. 

Чаңгы ярышын балалар башлап җибәрде. Алардан соң җитәкчеләр, төрле яшь категориясе буенча студентлар, өлкәннәр узышты.