Әлеге автобуслар шәһәр эчендәге маршрутлар буенча йөриячәк.
Күптән түгел районыбызның «Кукмор-Транс» оешмасы өр-яңа «Газель» автобуслары белән тулыланды. Оешма директоры Нияз Фатыйхов сүзләренә караганда, бүгенге көндә шәһәр эчендәге маршрутлар буенча 7 автобус йөри икән. «Кукмарабыз көннән-көн үсә, шуның өчен өстәмә автобуслар безгә бик кирәк», — ди ул.
«Яңа автобусларга утырып, тиешле маршрутта әйләнеп кайтырга да өлгердек. Яңа "Газель"ләр шулкадәр уңайлы, җайлы, тибрәнеп кенә йөрисең. Әлеге автобуслар озак еллар халыкка хезмәт итсен, тагын да яңалары өстәлеп торсын», — диде автобус пассажиры Альбина ханым Закирова.
Альбина Мөхәммәтовага да яңа «Газель» бик ошаган.
«Үз машинам булмагач, кирәк җиргә автобус белән барам. Яңасы бөтенләй яңача инде: җылы, якты, рәхәт», — ди ул.
«Газель» шоферы Рәсүл Хәсәновның руль артына утыруына 43 ел булган. Ул да яңа транспортның уңайлы булуын билгеләп үтте.
фото: Алсу Сәләхетдинова/ «Кукмор-информ»
«Кукмор Татарстан» Telegram-каналга язылыгыз
Нет комментариев