Акыллы мәсәл: уйла һәм эшлә

Бервакыт бер кешедән сәяхәтче үзен аргы якка чыгаруын сорый. Юлчы көймәгә утыргач, ишкәкләрдәге язуларга игътибар итә: берсенә — «уйла», икенчесенә «эшлә» дип язылган була.

— Ишкәкләрең бигрәк гади түгел икән, — ди сәяхәтче. 

— Әйе, — ди көймәче, елмаеп. Һәм «уйла» дип язылган ишкәк белән генә ишә башлый. Көймәнең бер урында әйләнеп торуын күреп:

— Кайчакта мин нәрсә турындадыр уйлыйм, планнар корам... Ләкин аның бернинди нәтиҗәсе дә булмый. Мин бу көймә кебек бер урында әйләнеп торам, — дип авыр сулый сәяхәтче.

Көймәче «эшлә» дип язылган икенче ишкәк белән генә ишә башлагач, көймә икенче якка әйләнә.

— Ә кайчакта мин уйламыйча, планнарсыз нәрсәдер эшлим. Шуларга күп көч һәм вакытымны сарыф итәм. Әмма, нәтиҗәдә, барыбер алга китә алмыйм, — ди сәяхәтче.

— Менә шуның өчен ишкәкләргә яздым да инде, — дип дәвам итә көймәче. — Бу тормышта һәр эшне уйлап, акыл белән эшләгәндә генә зур нәтиҗәләргә ирешергә мөмкин.

Фото: ясалма интеллект ярдәмендә ясалды