Атлар килә (шигырь)

Көмеш дуга, җиз кыңгырау:

Ел атлары килә пошкырып.

Алтын дагалардан ут чәчелә,

Килә алар ярсып, ашкынып.

Яшь атлар бит, әле чыгымлыйлар:

Өйрәнмәгән алар тәртәгә.

Буран уйный тояк тигән җирдә,

Ат елы бит, нинди мәртәбә!

Ходай кушып, илләр тыныч булса,

Җиһанымда булыр бәрәкәт.

Атлар алар хезмәт яраталар,

Ә шигаре - хәрәкәт!

Камчыламыйк, каударламыйк атны,

Җайлап тартсын илнең сукасын.

Ат ул тартыр авыр йөкләрне дә -

Зирәк башлар тотсын нуктасын.

Юл бирегез, дуслар, атлар килә,

Алар хуҗа илем елына.

Атлар исән булсын, хезмәт шавы

Сүнмәс илдә еллар буена.

Галиәхмәт ГАТИН

фото: http://new.agulife.ru/community/holidays/140209/