Кукмарага атлы-автомобильле узышта катнашучы инвалид спортчылар килде (фото)

Районда "Яр Чаллы-Болгар" маршруты буенча атлы-автомобильле узышта катнашучы инвалид спортчылар булып китте. Алар Кукмара беренче гимназиясендә - мәктәп укучылары, Зур Кукмара мәдәният йортында мәдәният хезмәткәрләре белән очраштылар. Кукмара төбәкне өйрәнү музеенда узган түгәрәк өстәл артында сөйләшү дә бик җанлы итеп оештырылган иде. Чарага районыбызның "Ак калфак" оешмасы вәкилләре дә чакырылып, алар җирле язучыларның әсәрләрен туплап нәшер ителгән "Күңел рәсем ясый" дигән китапны тәкъдир иттеләр. Җирле шагыйрьләр һәм кунаклар үзләренең шигырьләрен сөйләделәр, җырлар башкардылар, тәэсирләре белән уртаклаштылар.