Кукмара районының җиде җирлегендә мобиль поликлиника эшләде

«Сәламәтлек саклау» һәм «Демография» илкүләм проектлары кысаларында республика районнарында берничә юнәлеш буенча мобиль поликлиникалар эшли.

Узган ел тәгәрмәчле поликлиника, безнең районга да килеп, җиде җирлекнең Иске Юмья, Әсән-Елга, Манзарас, Байлангар, Зур Кукмара, Югары Чура, Нырья авылларында халыкны кабул итте. Махсус автомобиль-фургонда невролог, кардиолог, офтальмолог, уролог, ревматолог, гинеколог, терапевт, кан тамырлары хирургына һәм башка табибларга күренергә, бәвел, кан анализлары тапшырырга, ультратавыш белән тикшеренүләр (УЗИ) үтәргә, электрокардиография (ЭКГ) ясатырга, планлы диспансерлаштыруның икенче этабын узарга мөмкин иде. 

Заманча техника һәм җиһазлар белән тәэмин ителгән сәламәтлек поезды белән танышу өчен, Югары Чура җирлегенә юл тоттык. Безне авылның ачык йөзле фельдшеры Анастасия ханым Тукачева каршы алды. Аның инде медицина юнәлеше буенча эш тәҗрибәсе — 46 ел, ә биредә 1996 елдан хезмәт куя.

«Минем кечкенәдән кешеләргә ярдәм итәсем, авырган кешеләрне савыктырасым килде. Шуның өчен дә мәктәпне тәмамлауга, Казандагы медицина училищесына укырга кердем. Кулга диплом алганнан соң, иң элек Казанда, соңыннан Яр Чаллы шәһәрендә эшләдем дә, моннан 28 ел элек туган авылыма кайтып, үз белгечлегем буенча урнаштым. Шөкер, бүгенге көнгә кадәр халык сәламәтлеге сагында торам», — ди ул. 

Анастасия Николаевна Югары Чура һәм вакытлыча Пчеловод авыллары халкына хезмәт күрсәтә. Аның карамагында ике авылга 800дән артык кеше исәпләнә. 

«Фельдшер-акушерлык пункты ишегенең ябылып торганы юк, район үзәк дәваханәсе табибларына язылу өчен дә, дәвалану процедуралары алу һәм киңәшләр сорап та мөрәҗәгать итәләр. Халыкны күбрәк йөрәк-кан тамырлары, шикәр диабеты, сулыш алу системасы авырулары борчый. Һәркемгә үзвакытында ярдәм күрсәтәбез. Мобиль медицина комплексының безнең җирлеккә килүенә дә сөендек. Теләгән кеше, алдан язылып, төбәкара клиник-диагностика үзәге табибларына күренде», — ди фельдшер. 

Күчмә поликлиникада халыкны кабул итү, кешеләрнең моң-зарларын тыңлау, тиешенчә карау өчен бар мөмкинлекләр дә тудырылган. Төбәкара клиник-диагностика үзәгенең кан тамырлары хирургы Фәрхәд Сәлимов сүзләренчә, көн дәвамында 80нән артык кеше мөрәҗәгать иткән.

«Без, иң беренче чиратта, район үзәкләреннән читтә урнашкан җирлекләргә барабыз, халыкка сыйфатлы һәм югары технологияле медицина ярдәме күрсәтәбез. Табиблар вазыйфасына пациентларга консультация бирү генә түгел, зарурлык булганда операциягә, алга таба дәвалануны дәвам итү өчен төбәкара клиник-диагностика үзәгенә юлламалар бирү дә керә. Югары Чура авылына миннән тыш, кардиолог, эндокринолог, офтальмолог, ультратавыш белән тикшерү табиблары да килде. Мөмкинлекләре булмау сәбәпле, үзәктән ерак урнашкан торак пунктларда яшәүче күп кеше тиешле вакытында табибларга мөрәҗәгать итә алмый. Ә менә мобиль комплекска Югары Чурадан гына түгел, якын-тирә авыллардан да килделәр. Беркемне кире бормыйбыз, һәрберсен тыңлыйбыз, тиешле дәвалану билгелибез», — ди Фәрхәд Дамир улы. 

Югары Чура авылында яшәүче, җиденче дистәне түгәрәкләгән Антонина Хәсәнова халык сәламәтлеген кайгыртуга юнәлтелгән программаларны эшләүчеләргә, шулай ук табибларга рәхмәт сүзләрен ирештерде. 

«Өлкәнәя барган саен, табибларга даими рәвештә тикшеренеп торырга кирәк, чөнки каты авырып китеп, урынга егылгач, инде соң булуы бар. Казан табибларының безнең янга икенче ел килүе. Ничек уңайлы, яхшы бит! Кайчан күренер идек әле үзләренә. Ун көн алдан авылыбыз фельдшеры бу хакта хәбәр итеп, белдерү элде дә язылдык. Яртышар көн чират көтәсе юк, акча да түлисе түгел. Билгеләнгән вакытка үзеңә кирәкле табиб янына керәсең. Барлык кабул итүләр дә тиешле тәртип белән алып барыла. Бу юлы да табибларның һәммәсе игътибарлы, йомшак телле иде. Үзебезне борчыган сорауларны русча дөрес итеп җиткерә алмасак та, ике телне бергә кушып аңлаштык тагын. Яхшылап тикшерделәр, нинди дару төймәләре эчәсен сөйләделәр, аеруча нәрсәләргә игътибар итәргә кирәклеген әйттеләр. Сезонлы авырулар, салкын тиюләр булганда, үзебезнең фельдшер Анастасиягә мөрәҗәгать итәбез. Ул бик тәҗрибәле, үзенең шифалы куллары, җылы сүзләре белән дә дәвалый ала. Армый-талмый озак эшләсен, үзе чирләп китә күрмәсен дип кенә торабыз», — ди ул.

фото: Виктория Алексеева