Әйбәт кеше аның кебек була
Үтә дә тыйнак, бар эшкә дә кулы ята торган, кешелекле, диләр Ринат абый Сәләховны белгән һәркем. Шулайдыр. Тыйнак икәнлеге күренеп үк тора: тормыш иптәше Флера ханым аз гына күбрәк сөйләшеп куйса да, Ринат абый шунда ук аның “җиңеннән тарта”. “Алтын куллы” булуын хуҗалыгындагы үзе ясаган, төзегән һәр нәрсә “сөйли”. Агач, калай эшеме ул, кирпеч салумы - барысын да булдыра. Ә инде тормыш девизының “Беркемне дә рәнҗетмә!” дип язылып куелуы исә аның кешелекле, киң күңелле булуын күрсәтә.
