Кукмараның «Урал» җәмгытендә техникалар әзерлек сызыгында

«Урал» җәмгыятьнең директоры Нияз Хәбибрахмановның сүзләренә караганда, хуҗалыкның 6 мең 86 гектар сөрүлек җирләре бар, чәчүлек мәйданнар 5 мең 738 гектарны тәшкил итә. Аның 42 процентында — бөртеклеләр, 37 процентында — азык, калганында техник культуралар игәләр. Мөгезле эре терлек саны — 1 мең 824, шуның 670е — савым сыерлар. 

«Бүгенге көндә язгы чәчүгә әзерлек эшләре ахырына якынлаша, минераль ашламаларны кайтарып бетерәсебез бар», — диде җитәкче.

Хуҗалыкта барлыгы 800 тонна чәчүлек материал әзерләнгән. Ул кирәкле күләмнең 200 процентын тәшкил итә. Шуның 45 проценты — оригинал, 20 проценты — элита, калганы — репродуктив орлыклар. Хуҗалыкның баш агрономы Илназ Галәветдинов язгы чәчү кампаниясе 13–15 көн дәвам итәр дип фаразлый. Тырмалау, катоклау эшләре 11–13 көнгә сузылыр дип көтелә. Билгеле, монда һава шартлары да зур йогынты ясый. Хәзерге вакытта төп эш — орлыкларны агулау.

«Урал» җәмгыятенең Зур Кукмарада урнашкан машина-трактор паркында техникалар тезеп куелган. Җәмгыятьнең баш инженеры Заһит Ярмиевның сүзләре буенча, техникаларның язгы кыр эшләренә әзерлеге 99 процентны тәшкил итә. Шушы көннәрдә авыл хуҗалыгы һәм азык-төлек министрлыгыннан килгән тикшерү дә моңа югары бәя бирде. 

«Зур Кукмара һәм Өлге ягындагы гаражларда төп өч һәм дүрт кешедән торган ике ремонт бригадасы эшләде, механизаторлар исә тракторларын үзләре карады. Шулай ук үзебезнең эретеп ябыштыручы, токарь бар. Ремонт барышында запас частьлар белән авырлыклар тумады. Без көз көне, техникалар кыр эшләреннән туктау белән дефектовка ясап, кирәкле детальләрне кайтарту өчен, тәэмин итүче оешмалар белән элемтәгә кереп, заказ биреп куябыз. Бүгенге көндә өстәмә, алмаш детальләр 90 процент әзер тора. Ремонт эшләре төгәлләнеп килә, ай ахырында үткәреләчәк техник күзәтүгә тулысынча әзер булачакбыз. Ремонтланган техника үзенең нәтиҗәсен бирергә, кызу эш вакытында зур ватылулар булмаска тиеш», — диде Заһит Ярмиев.

Җәмгыятьтә хезмәт хаклары вакытында түләнә, шуңа күрә кадрларга кытлык юк, техникалар да механизаторлар белән комплектланган.

«Ягулык станциясендә, Өлге ягында склад мөдире булып яңа укып кайткан егетләр эшли. Молодцы, яшьләр булдыра. Хуҗалыкка кайту гына түгел, һәркем хезмәтен яратып, җанын-тәнен биреп башкарырга да тиеш. Шуннан башка авыл хуҗалыгында эш бармый», — диде баш инженер. 

Үткән ел хуҗалыкта инвестицияләр күләме 133 миллион сумны тәшкил иткән. Шуның 9 миллион сумына авыл хуҗалыгы машиналары һәм техникалар сатып алынган. Калганын төзелеш һәм ремонт эшләре алып тора. 

«2024 елда 400 савым сыерга исәпләнгән мал торагы, кыш көне комплекс территориясендә техникаларны кую өчен 760 квадрат метр зурлыкта җылы стоянка салынды. Моңарчы машина-тракторлар Өлге һәм Зур Кукмарадагы гаражда тора, ремонт эшләренә комачау итә иде. Хәзер бу корылмалар бары тик ремонт өчен генә файдаланылачак. Шулай ук ике лагуна ясалды. Комплекска керү юлында ветеринария таләпләренә туры китереп, санитар пропускник эшләнә башлады, аны май айларында төзеп бетерергә уйлыйбыз. Өлгедә 900 тонна сыйдырышлы орлык склады салынды. Аны һәр культураны аерып салу өчен уңайлы булсынга бүлеп, аерым керү юлы, ишекләр белән эшләдек. Көздән комплекс территориясендә, яңа төзелешләргә дип, мәйданчыкларны әзерли башлаган идек. Яз көне 600 савым сыерга исәпләнгән бер мал торагы салырга планлаштырабыз. Зур Кукмара паркында төзекләндереләсе бер склад калып бара», — диде Нияз Хәбибрахманов, башкарылган һәм планлаштырылган эшләргә аерым тукталып.

Илдар Федотов, механизатор:

Мин Сазтамак авылыннан, бирегә урнашканыма җиде еллап. Аңа кадәр Лесхозда агач утыртуда эшләдем. Хезмәтем ошый, зарланырлык түгел. МТЗ-82 тракторы белән кайда куйсалар, шунда эшлим: кыш көннәрендә ферма тирәсендә салам, печән төйим, җәй көне корткычларга каршы агу сибәргә басуга чыгам... Тракторны үзем ремонтлап торам. Велосипед җыйдың ни дә, трактор җыйдың ни. Ул 2001 елгы, шуңа күрә ватылган чаклары да була. Әмма карт кеше буразна бозмый, дигән кебек, гел бик әйбәт эшли ул, зарланмыйм. Гомумән, техниканы яратам, җиденче сыйныфта укыганда әти белән чылбырлы тракторда сукага чыга идем. Шуңа күрә бу — кечкенәдән өйрәнеп үскән хезмәт.

фото: Ризилә Корбанова/ «Кукмор-информ»