Татар авылында “Хуҗалык кирәк-яраклары” дигәнне аңламаслар дип уйладыгызмы әллә?

Безнең төбәк үзенең төзеклеге, матур йортлары, эшчән кешеләре белән данлыклы. Әледән-әле яңа йортлар, көнкүреш биналары калкып чыга: авылның йөзе үзгәрә, тулылана бара.

Әле менә яңа елга аяк баскач кына да авылыбызның кыл уртасында тагын бер кибет - "Хозяйственные товары" калкып чыкты. Татар авылларында халыкның тырыш, эшчән булуын күрсәтүче дәлил дә бит әле бу күренеш. Кайбер урыс авыллары (сирәк кенә булса да татар авыллары) юкка чыгып бара торган заманда, бездә һаман үсеш, һаман артым... Аллага шөкер!

Әмма тәмле ашка төшкән таракан бөтен табынның ямен бозган шикелле, бу урында үземнең ризасызлыгымны, үпкәмне бердермичә кала алмадым.

Кибетнең "маңгаена" матур, эре хәрефләр белән "Хозяйственные товары" дип язылган. Татар авылында "Хуҗалык кирәк-яраклары" дигәнне аңламаслар дип уйладылар микән? "Хуҗалык кирәк-яраклары" дип язылган очракта, авылдашларыңны олылау, әти-әниеңне, белем биргән укытучы-тәрбиячеләреңне хөрмәтләү булып та аңлашылыр иде, минемчә. Бу кибетнең сатып алучылары күп булсын, гомере озын булсын, хуҗалык кирәк-яраклары киштәләрдә тузан җыеп ятмасын.

Рәсүлә Шакирова, Олыяз авылы