Кукмара районындагы пляж (Кукмарада су коенырга мөмкин булган җиһазландырылган урыннар)

Җәйге җылы көннәр җитү белән, пляж сезоны башлана. Кукмара районы территориясендә барлыгы 36 сулык бар, аларның барысы да авыл җирлегендә урнашкан. Бары тик Киндеркүл буасы гына су коенырга яраклы. Киндеркүл авылы янындагы пляж — зур булмаган, каралган, тиешле тикшерүләр узган һәм ял итүчеләрне кабул итәргә рәсми рөхсәт алган урын. Ә башка сулыкларда коену катгый тыела. 

Бирегә күпләр гаиләләре белән ял итәргә килә. Суы җылы, аның сыйфаты тикшерелгән. Пляжда иртәнге тугыздан кичке сигезгә кадәр коткаручылар кизү тора. Суга батучыга ярдәм күрсәтү өчен кирәкле бөтен әйберләре: көймә, жилетлар, коткару түгәрәге һәм башка җайланмалары бар. Монда бәдрәф тә урнаштырылган. 

Пляж чиста ком белән капланган, суга төшү сөзәк, бу балалы гаиләләрне җәлеп итә, шулай ук балалар өчен суда аерым койма белән уратып алынган участок бар. Актив ял итүне өстен күрүчеләр өчен пляж янында махсус спорт мәйданчыгы җиһазландырылган.

2024 елның августында пляжда Кукмара спорты тарихында беренче тапкыр пляж футболы буенча турнир, шулай ук сап-бордта йөрү буенча ярышлар узды. Сап-бордны шәһәребез халкы тиз арада бик яратып өлгерде.

Суда куркынычсызлык кагыйдәләрен дә онытмау мөһим.

Суда үз-үзеңне тотуның төп кагыйдәләре

Сулыкларда ял иткәндә һәм су коенганда түбәндәге кагыйдәләрне үтәргә кирәк:

1. Суга керер алдыннан әзерлек:

• тәнне җылыту өчен берничә җиңелчә күнегү ясагыз;
• әйләнә-тирәдәге шартларны (сулыкның тирәнлеген, агымын, каршылыклар булу-булмавын) игътибар белән тикшерегез;
• суның температурасы яраклы һәм тәкъдим ителгән нормадан түбән булмавына инангач кына керегез.

2. Йөзгәндә куркынычсызлык:

• сулыкның тирәнлеген белмәгән очракта чуммагыз;
• бәрелешү һәм җәрәхәтләр булмасын өчен, башкалардан ераграк йөзегез;
• су коенганда ерак йөзеп керергә тырышмагыз, чөнки арыганлыктан үз көчегезне исәпләп бетермәскә һәм ярга кадәр йөзеп чыга алмаска мөмкинсез;
• тәнегез суынмасын өчен, суда 30 минут кына коеныгыз.

3. Сәламәтлек турында кайгырту:

• эссе сугуны булдырмас өчен, су коенганда һәм пляжда ял иткәндә башыгызга киегез;
• сыеклыкны күбрәк эчегез.

Әгәр коенырга гына түгел, ә суда актив спорт төрләре белән дә шөгыльләнергә уйлыйсыз икән, һичшиксез, коткару жилеты, шлем, саклагыч күзлек киегез, чөнки алар җәрәхәтләнү куркынычын киметергә ярдәм итәчәк.

Суда ял иткәндә балаларның куркынычсызлыгы:

• Алдан ук балаларга су коенуның куркыныч икәнен һәм сулыкларда үз-үзеңне тоту кагыйдәләрен яхшылап аңлатыгыз.
• Сулыкларда балаларны беркайчан да караучысыз калдырмагыз. Аларга кичекмәстән ярдәмгә килү өчен, олылар һәрвакыт янәшәдә булырга тиеш.
• Су коенганда балаларга үзләренең яше һәм авырлыгына туры килә торган коткару жилетларын кияргә мөмкин. Саклану чаралары дөрес сайланырга һәм ышанычлы беркетелергә тиеш.
• Бала тәҗрибәле инструктор күзәтүе астында йөзү күнекмәләрен үзләштергән булса да, барыбер тирәнгә керергә ярамый.

Суда ял иткәндә чикләүләр

• Иҗтимагый пляжларда үз-үзеңне ничек тотарга соң? Әгәр сез пляжда су коенырга уйласагыз, андагы һәркемгә хөрмәт белән карау мөһим. Әдәп-әхлак кагыйдәләрен онытмагыз һәм әйләнә-тирәдәгеләргә комачауламагыз. Үз-үзегезне тотышыгыз башкаларга уңайсызлык тудырмаска тиеш. Моннан тыш, үзегездән соң чүп-чар калдырмагыз.