Раяз Фасыйховның кызы тәүге җиңүен яулаган (+Фото)

Татарстанның атказанган артисты Раяз Фасыйховның кызы Венераны күпләрнең "Балалы солянка"да күргәне бар. Талантлы кыз әтисе белән концертларда чыгыш ясаудан тыш, үзе дә вокал белән ныклап шөгыльләнә. Ә күптән түгел узган Миңгол Галиев исемендәге «Җырчы-сандугач» җыр бәйгесендә Венера Фасыйхова җиңү яулады.

- Раяз, кызыңны тәүге уңышы белән котлыйбыз! Нинди җыры аңа җиңү китерде?

- Венера Миңгол Галиев исемендәге «Җырчы- сандугач» җыр бәйгесендә беренче тапкыр катнашып, беренче дәрәҗәдәге стипендия лауреаты булды. Кызымның уңышына барыбыз да сөенәбез, горурланабыз. "Алфавит" дигән җыр башкарды. Аны мин өйрәткән идем.

- Җырчы буларак, Венера белән махсус шөгыльләнәсеңме?

- Кирәк булса, өйрәтәм. Ләкин аның үзенең укытучысы бар.

- Хоккей карарга еш йөрисеңме? Узган ялда микроблогыңда уеннан видео урнаштырган идең.

- Гаиләбез белән "Татнефть Арена"га "Ак Барс"ның уйнаганын карарга барган идек, кызганыч, җиңелделәр. Туры килсә, барабыз, яратып карыйбыз, җиңсәләр бигрәк тә!

- 8 март бәйрәме якынлаша. Тормыш иптәшең бүләккә "заказ" бирдеме әле?

- Юк, ул яктан хатыным "скромный", үзе сорап алмый. Әле бүләк аласы бар. Бәйрәмнәрдә бер-беребезгә бүләкләр бирешәбез. Тик шулай да, минемчә, бүләккә караганда да мөһимрәге - ул яраткан кешеңнең янәшәңдә булуы.

Эльвира ШАКИРОВА
Интертат.ру