Мәчетебезне яңартыйк!

Мин уйлап-уйлап йөрдем дә, авыл мәчетенә укырга йөрергә булдым. Бәхетемә, ул вакытта безнең авыл мәчетендә дә дини укулар башланган иде. Дөрес, дини гыйлемле булу барыбызга да кирәк. Мин дә: "Иптәшләремнән калмыйм әле!" - дип, балаларның мәчеткә җыенганнарын күреп, шунда ашыктым. Мөгаллимәбез Нурия апа Фәсхетдинова безгә Аллаһы Тәгалә, Адәм белән Һава, фәрештәләр һәм шайтаннар, хәләл белән хәрам турында сөйләде. Без авызларыбызны ачып, таң калып, могҗизалы хәлләр турында тыңлап утырдык. Аннан соң мөгаллимәбез намаз уку тәртибен өйрәтте. Барыбыз бергәләп намаз укып карадык. Сүрәләрне ятлагач, Нурия апа безгә гарәпчә хәрефләрне танырга өйрәтте. Шулай итеп, без өлкәннәрне хөрмәтләргә, кечкенәләргә юл бирергә, әдәп-әхлак турында, намаз укырга, азан әйтергә өйрәндек. Ял көннәрендә мәчеткә йөрүче балалар белән дини бәйрәмнәрне әби-әниләребез алдында өйрәнгән догаларны укып күрсәтеп, чәй эчеп күңелле итеп уздырдык. Бер-беребез белән узыша-узыша дини белем алдык.
Быел безнең авылда халыктан җыелган ярдәм акчасы белән яңа мәчет төзелә башлады. Янсыбы авылында туып-үскән, хәзерге вакытта районыбызның бүтән авылларында, поселок-шәһәрләрдә яшәгән, Янсыбы мәчетенә, зиратына битараф булмаган авылдашлар! Көчегездән килгәнчә мәчет салганда үз өлешегезне кертеп, ярдәм итсәгез, үзегезгә бик зур савап булып кире кайтыр иде.