Кукмарада рейд вакытында ЮХИДИ инспекторлары юл хәрәкәте кагыйдәләрен бозуның 14 очрагын ачыклаган

10 августта 13.00 сәгатьтән 15.00 сәгатькә кадәр, ЮХИДИ хезмәткәрләре участок вәкилләре белән берлектә, Кукмараданың Ленин урамында «Тоннель» операциясе үткәрде. Бу хакта район ЮХИДИ бүлегендә хәбәр иттеләр.

Рейд барышында юл хәрәкәте кагыйдәләрен бозуның 14 очрагы ачыкланган. Болар: куркынычсызлык каешларын куллану кагыйдәләрен бозу (ике очрак), җәяүлеләрнең юл хәрәкәте кагыйдәләрен үтәмәве (алты очрак), укылмый торган дәүләт номерлары, теркәлмәгән транспорт, иминият полисы булмаган килеш хәрәкәт итү, электр самокаты белән йөргәндә кагыйдәләрне инкарь итү (берәр очрак).

Моннан тыш, исерткеч эчемлек куллану билгеләре булган ике шофер ачыкланган. Аларның транспортлары штрафлар тукталышына куелган.

фото: kukmor-rt.ru