Игътибар - переезд!

Районда биш тимер юл переезды бар, шуларның бары тик берсе - саклана торганы гына - махсус каршылык корылмалары, тавышлы һәм утлы сигнализацияләр белән җиһазландырылган. Тимер юл аша узганда тиешле кагыйдәләрне бозган өчен узган елның 5 аенда ЮХИДИ инспекторлары тарафыннан 107 беркетмә төзелгән иде. Быел исә 57 автомобиль йөртүче штрафка тартылды. Юл йөрү кагыйдәләрен үтәмәгәннәргә административ хокук бозулар Кодексының 12.10 маддәсе, 1 бүлеге нигезендә 500 сум штраф яисә 3 айдан 6 айга кадәр транспорт чарасын йөртү таныклыгыннан мәхрүм ителү каралган. Кагыйдәне бозу кабатланган очракта Кодексының 12.10 маддәсе, 3 бүлеге буенча шофер кеше бер ел буена руль артына утыра алмаячак.
Тимер юл аеруча куркыныч зона булып санала. Светофорның кызыл утына переезд аша чыккан кешеләрне, автомобильне поезд йөртүче күрсә дә, составны берничек туктата алмый. Бәла-казаларга очрамас, якыннарны кайгы-хәсрәт утына салмас өчен кабул ителгән кагыйдәләрне үтәргә, сак һәм игътибарлы булырга кирәк.