Кышкы буран: Бу күренеш күңелгә җылылык һәм тынычлык бирә

Кышкы бураннарны мин һәрвакыт үзенчә көтеп алам. Күпләр өчен ул авырлык, юл газабы, салкын булса, минем өчен буран — табигатьнең матур мизгеле кебек. Ул килгәндә, дөнья бераз туктап кала, ашыгу бетә.

Өйдә җылы. Тәрәзә артында буран уласа да, эчтә тынычлык хөкем сөрә. Кайчак тәрәзә янына килеп, тышка карыйсың. Кар бөртекләре ут яктысында бөтерелә, оча, юкка чыга. Бу күренеш күңелгә ниндидер җылылык, тынычлык бирә. Буран кешегә үз-үзе белән сөйләшергә мөмкинлек тудыра кебек.

Кышкы бураннар безне сабырлыкка өйрәтә. Алар табигатьнең көчле икәнен дә, шул ук вакытта матурлыгын да күрсәтә. 

Сүрия, Кукмара

Фото: «Кукмор-информ»