Татарстан хезмәт, мәшгульлек һәм социаль яклау министры Эльмира Зарипова Кукмарага килде

Татарстан Республиканың Хезмәт, мәшгульлек һәм социаль яклау министры Эльмира Зарипова бу атна Кукмарага килгәч иң элек гражданнарны кабул итте.

Сорауларның берсе «Хезмәт ветераны» исемен алуга кагылышлы иде. Ир-атның гомуми эш стажы 45 ел, юбилей, муниципаль бүләкләре, Рәхмәт хатлары бар. 

«"Хезмәт ветераны" исемен алу өчен ике шарт кирәк: билгеле бер стаж, ул сезгә туры килә, шулай ук дәүләт бүләкләре һәм ведомствоның аерым билгеләре булу. Әмма сезнең андый бүләкләрегез юк. Шуңа күрә, исем бирелмәү законга туры килә», — дип аңлатты Республиканың Хезмәт министрлыгы башлыгы. 

Шулай ук эшкә урнашу, сугыш хәрәкәтләре ветераннары өчен торак-коммуналь хезмәтләре өчен түләүне компенсацияләүгә кагылышлы сораулар бирелде.

Район халкы белән очрашудан соң Эльмира Зарипова министрлыкка караган учреждениеләр эшчәнлеге белән танышты, «Шәфкать» тернәкләндерү реабилитация үзәге хезмәткәрләре һәм анда йөрүчеләр белән аралашты.

Фото: Эльвира Иванова/ «Хезмәт даны»