Кукмарадан йөк төялгән КамАЗ машинасы хәрбиләр янына ерак сәфәргә кузгалды

Махсус хәрби операция зонасындагы ир-егетләргә ярдәм итү районда оешкан төстә башкарыла. Бүген хәрбиләрнең соравы буенча әзерләнгән гуманитар ярдәм Донецк Республикасына юл тотты. КамАЗ автомобиле пиломатериаллар, хуҗалык кирәк-яраклары, эш кораллары алып китте.

«Хәрбиләргә көчтән килгәнчә ярдәм итәргә тырышабыз. Узган атнада бер полкка пиломатериаллар юллаган идек. Бүген полк командиры җибәргән КамАЗ автомобиленә блиндаж төзү өчен кирәк-яраклар тутырдык. Йөк арбасында ОСБ плитәләре, брусок, такталар, утеплитель - барлыгы 10-12 кубометр пиломатериал, шулай ук мич, көрәк, кувалда, саморез, кадак, бензин пычкысы, шуруповерт һәм башка кирәк-яраклар урын алды, арбада бер буш урын да калмады. Шушы арада Екатеринбургтан кайтышлый да 20 кубометр пиломатериал кереп алачаклар. Боларның һәммәсен хәрбиләргә исән-имин алып барып тапшырырга язсын», — ди Фәнил Наил улы.

КамАЗ автомобиле шоферы Равил Саттаров — Бурятия Республикасыннан. 

«Өйдә торган да юк, гел юлда мин. Ерак сәфәргә йөрергә ияләндем инде. Моннан тиешле ноктага кадәр якынча 2 мең чакрым юл үтәргә кирәк. Өч көн эчендә барып җитәргә исәп. Иң мөһиме: техника ватылмасын, уң юга чыгарга язсын», — ди ул.

Равил Саттаров белән бергә хәрби часть вәкиле дә бар. Вячеслав исемле егет — Тукай районыннан.

«Өлешчә мобилизацияләү башлангач та киттем. Бүгенге көндә матди-техник тәэмин итү ротасында хәрби хезмәт узам. Кукмарадан гуманитар ярдәм килгәне бар. Ә менә үземнең биредә беренче тапкыр булуым. Блиндаж, окоплар төзегән вакытта пиломатериаллар безгә бик кирәк. Үтенечебезне кире какмаган өчен Фәнил Наил улына зур рәхмәт. Яхшылыклары үзенә күп тапкырлар өстәлеп кире кайтсын. Фронт алга таба бара, җиңү безнең якта булачак!» — ди ул.

фото: Алсу Сәләхетдинова/ «Кукмор-информ»